(Лохэ япхъу Минэт и тхьэусыхэ уэрэд)

Пасэ зэманым абазэпщ Лохэ куэд зылъэкIыу Абазэ-Шэрджэс хэкум исащ. Лохэ къулейуэ, Iэщ я куэду, езым я шы лъэпкъ «Ло» и цIэу къагъэхъуауэ, адыгэ хэку псоми щыцIэрыIуэу щытащ. Тамбий Дыгулыбгъу Адыгейм кIуэуэ Бэлэтокъуэхэ я шыбзыр къыщихуам зытесар Лохэ я шы лъэпкъщ. Абы тесу жэщым Бахъсэн къиуауэ къыхыхьэри, итхьэлауэ щытащ ишри езыри.

 Лоужь гущэм и саур бгъуитIым, 
 Лъы бахъэр къызэрохьэх;
 Псыхьэлыгъуэм хуэдэу кърихьэхыжри,
 Тамбий и къуэкIэ пщы Дыгулыбгъущ.
 Ло гущэу уи Лоутхъуэжьыр
 Къэрэтобэ къыщогъэщыщ, 
 Дыщэм хуэдэурэ уи дыщэ быныр
 Бахъсэн псыхъуэ къыщогъэщыгъуэ, - жеIэ Дыгулыбгъу и уэрэдым.

 Урыс пащтыхь Александр ЕтIуанэм и тэрмэшу, и адъютанту щытащ полковник Ло Мэмэт-Джэрий, Бытырбыху кадет корпус къыщиухауэ. Лохэ я IэмыщIэ илъащ тенджыз ФIыцIэм и Iуфэм Iут мафIэгу къэувыIэпIэ цIыкIур. Езы Лохэ Псыжь и Iуфэм Iусащ.

 АтIэ, апхуэдизу зылъэкI абазэпщ Лохэ япхъу Минэт дахэр лъхукъуэлI унагъуэ гуэрым залымыгъэкIэ иратати, мы тхьэусыхафэ уэрэдыр иусащ. Уэрэдыр абазэхэм абазэбзэкIэ, шэрджэсхэм адыгэбзэкIэ жаIэу, я уэрэд гъэфIэну щытащ. Мис ар:

 Лохэ срапхъут, 
 Ежьу: Уо-ра, уо-уо-рирэ, уо!
 ЛIы сратри! 
 Ежьу: Уо-ра, уо-уо-рира, уо!
 Сызратри уи шабий вакъэт.
 Срамыпхъуу срапхъурылъхутэмэ, 
 ЛIы сратыххэнтэкъым.
 Вы къарэжь фиIэти - лъакъуищт.
 Зэшыжьищ фохъури - фи зырызщ.
 Мэш хьэсищ фиIэщи - мацIэ хъуахуэщ.
 Зэшыжьищ фохъури - фи зырызщ.
 Псыжь Локъуажэр - Локъуажэжьт.
 Вакъэ зэпэIудэт, упщIэ лъеижьыр дамыгъэт.
 УнэмкIэ сокIуэри, гуащэжьым сыщIигъэхьэркъым.
 ЖьантIэмкIэ сокIуэри, пщыжьым идэххэркъым.
 ПэшымкIэ сокIуэри, пщыпхъум сыщIигъэхьэркъым.
 Дэнэ мыгъуэм сыкIуэжыххэну - сотхьэусыхэ!
 ХьэщIэщыжь фиIэти, уи хьэгъэщтт.
 Псыжь и псыхъуэр нэпскIэ согъажэ.
 Алътогъуз и джабэхэм сыкIэрохьэ.
 Алътогъуз и пхъэ дакъэхэри си пIэщхьагът. 
 Алътогъуз и пщIащэхэри си уэншэкут.
 Ар си щхьэцыгъуэшхуэри дзажэ щIэдзт.
 Ар си IэблэшхуитIри пщэрыдзэнт!

 Уэрэдыр дэзыгъэтхар КIэм Iэюбщ, дежьур Hэнджэщауэ Исмелщ (1968 гъэ).

КЪАРДЭНГЪУЩI Зырамыку.